પોરબંદર LCBએ ઘરફોડ ચોરીના ૩ ગુનાનો ભેદ ઉકેલ્યો: સોના-ચાંદીના દાગીના સાથે મહિલા આરોપી ઝડપાઈ
પોરબંદર: પોરબંદર જિલ્લાના રાણાવાવ અને બગવદર પોલીસ સ્ટેશન વિસ્તારમાં થયેલી ઘરફોડ ચોરીના ગુનાઓ ડામવા માટે પોલીસ સતર્ક બની છે. જૂનાગઢ રેન્જના પોલીસ મહાનિરીક્ષક નિલેશ જાજડીયા અને પોરબંદર પોલીસ અધીક્ષક ભગીરથસિંહ જાડેજા દ્વારા આપવામાં આવેલી સૂચના મુજબ, LCBની ટીમે ટેકનિકલ અને હ્યુમન સોર્સીસની મદદથી ત્રણ જેટલી ઘરફોડ ચોરીનો ભેદ ઉકેલી નાખ્યો છે.
ઝુપડપટ્ટી વિસ્તારમાંથી મહિલાની ધરપકડ
LCB સ્ટાફ પેટ્રોલિંગમાં હતો તે દરમિયાન બાતમી મળી હતી કે રાણાવાવ રેલ્વે સ્ટેશન પાસે આવેલી ઝુપડપટ્ટીમાં ચોરીના ગુનામાં સંડોવાયેલ મહિલા આવનાર છે. જેના આધારે પોલીસે વોચ ગોઠવી કાજલબેન વિશાલભાઈ રાઠોડ (રહે. ઘાટવડ, તા. કોડીનાર) નામની મહિલાને ઝડપી પાડી હતી. તેની પાસે રહેલી થેલીની તલાશી લેતા તેમાંથી મોબાઈલ ફોન અને સોના-ચાંદીના દાગીના મળી આવ્યા હતા.
કુલ ૧૪.૮૦ લાખનો મુદ્દામાલ જપ્ત
પોલીસે આરોપી મહિલા પાસેથી નીચે મુજબનો મુદ્દામાલ કબજે કર્યો છે:
- સોનાના દાગીના: વિવિધ ડિઝાઈનના ૦૩ જેન્ટસ ચેઈન, ૦૧ લેડીઝ ચેઈન, ૦૪ જેન્ટસ વીંટી, ૦૩ લેડીઝ વીંટી, ૦૧ પેન્ડલ અને સોનાની બાલીની જોડી.
- ચાંદીના દાગીના: ૩૦ ગ્રામનો ચાંદીનો ઝુડો.
- અન્ય: વીવો કંપનીનો મોબાઈલ ફોન.
કુલ કિંમત: રૂ. ૧૪,૮૦,૬૫૦/- નો મુદ્દામાલ રિકવર કરવામાં આવ્યો છે.
ચોરીની કબૂલાત અને ગુનાહિત ઇતિહાસ
મહિલાની પૂછપરછમાં જાણવા મળ્યું હતું કે તેણીએ તેના પતિ આતીશ ઉર્ફે વિશાલ અને દિયર રાહુલ સાથે મળીને રાણાવાવના રાણા ખીરસરા તેમજ બગવદરના બોરીયા અને રોજીવાડા ગામમાં ચોરી કરી હતી. આ ટોળકી અગાઉ અમરેલી અને બોટાદ જિલ્લામાં પણ ચોરીના ગુનામાં સંડોવાયેલી હોવાનું બહાર આવ્યું છે.
આ કામગીરી કરનાર ટીમ
આ સફળ કામગીરી પોરબંદર LCB ઇન્ચાર્જ PI આર.કે.કાંબરીયા, ASI રાજેન્દ્રભાઈ જોષી, રણજીતસિંહ દયાતર તથા LCBના અન્ય કર્મચારીઓ દ્વારા કરવામાં આવી હતી.
